Empanadas presentadas ao concurso

Dende 1975, A Bandeira elixe a mellor empanada do país entre as decenas de creacións que se presentan cada ano a un dos concursos gastronómicos máis antigos e de maior prestixio de Galicia.

Na actualidade, existen tres categorías:

• Profesionais, conformada por empanadas presentadas por panaderías e restaurantes.
• Amateur, que conta con empanadas presentadas por particulares amantes da cociña.
• Infantil, pensada para a rapazada de entre 6 e 12 anos.

Rapaza elaborando unha empanada do concurso

É importante sinalar que NON é necesaria a inscrición previa das empanadas senón que estas serán entregadas á organización na propia xornada da Festa da Empanada (sábado), en horario de 11:00 a 12:30 horas.

Todas as empanadas presentadas son puntuadas por un xurado composto por profesionais do mundo da gastronomía, quen deben valorar en primeiro lugar a presentación e, posteriormente o sabor a través dunha cata.

Tras o veredicto do xurado profesional, procédese á entrega dos prestixiosos premios da Festa da Empanada:

Categoría profesionais, amateur, infantil (por categoria):

1. Mellor empanada do país
2. Segunda mellor empanada do país
3. Terceira mellor empanada do país

Categoría profesionais e amateur:

1. Empanada coa mellor masa do país
2. Empanada máis tradicional do país
3. Empanada máis orixinal do país

Empanadas presentadas ao concurso

A continuación, as empanadas gañadoras pasan a subastarse entre o público asistente, chegando a alcanzarse os 2.400€ por unha empanada. A recadación destínase a fins culturais e sen ánimo de lucro.