Camilo Jose Cela na Festa da Empanada

A Festa da Empanada da Bandeira nace no ano 1974, cando un grupo de amigos e amigas deciden levar unhas empanadas a unha fermosa carballeira da vila para gozar dunha amigable tarde ao son da música tradicional galega. Esta humilde merenda, que reuniu a unha decena de familias, foi o xermolo dun dos eventos gastronómicos máis importantes de Galicia.

Empanada presentada ao concurso

A idea gustou moito entre a veciñanza da Bandeira e ao ano seguinte decidiuse realizar a I Festa da Empanada cun pequeno concurso para elixir a mellor empanada entre as diferentes creacións que elaboraban as familias e que eran expostas nun tradicional carro de vacas de madeira.

Declaración de Interese Turístico Galego

O éxito da segunda edición, que comezou a atraer xente dos arredores da Bandeira provocou que a Festa da Empanada tivera que buscar unha carballeira moito máis ampla. A partir de aquí, a evolución deste evento foi imparable ata congregar cada terceiro sábado de agosto a miles de persoas chegadas dende todos os puntos da xeografía.

Será no ano 1999 cando a Asociación Amigos da Empanada logre o recoñecemento de Festa de Interese Turístico Galego,conformándose como un evento gastronómico ineludible do verán galego.

Público asistente á Festa da Empanada

Na actualidade, a Festa da Empanada é un referencia da oferta das celebracións gastronómicas de Galicia fusionando a degustación do produto estrela coas manifestacións culturais da nosa identidade como a artesania, a música ou os xogos e tradición oral.

Dende o ano 2018, a Festa da Empanada da Bandeira é firme candidata a lograr o título de evento de Interese Turístico Nacional, logrando apoios de persoeiros políticos e da cultura como Alfonso Rueda, Mariano Rajoy, Cristina Castaño, Roi Méndez, Luis Cepeda ou Pepe Domingo Castaño. Ademais diferentes cociñeiros con distintivo de calidade ou con estrela michelín como Martín Berasategui, Pepe Solla ou Lucía Freitas implícanse na posta en valor desta festa e apoian esta candidatura.

Tal é a magnitude da Festa da Empanada, que no ano 2023 estreou o seu propio himno, composto polo artista Sergio Rodríguez.